نويــِّر

صرت احتري زولك لامر مسيّر
كني معك معزوم كل عصرية

من شفت عينك والخفوق مطيّر
طيره يحوم ولا نوى لي جيّه

كنّي بسبايب نظرتك يا نويّر
مقلوع عن خيله نهار الهيّه

الجيب حنّ ولا قدرت اغيّر
رمشك تقل طاعنّي بشبرية

لبى الخديد المستدير النير
كن القمر ذايب بخدّ بنية

شمحوطة ٍ عنقا دقاق نحيّر
وعلى بعضها مربربة ممليّة

عكس الهواء تمشي وفزّ دويّر
كنّه خديد الطفلة الشّامية

نهد ٍ لهو ظالم ولاهو صغيّر
مغرور لكن واضح الحنيّة

وردوفها ياهي لعينة خيِّر
تمشي مثل تشنيفة الكدرية

لبّى الخصر , لاوالله إلا خصيّر
تقفل عليه السّاعة اليديّة

لاني سفيه ولا انا بغريّر
يوم اتحرّى جيَّة العفريّة

مْسيّر ٍ غصب ٍ منا المتخيِّر
تسوقني غصبن علي رجليه

في حيِّهم ماكني إلأ سيّر
و ادعي متى تظهر هكا لعبيه

اليا ظهرت كني بوسط سعيّر
ارمي شماغي واقرط الطاقيه

سلّمت وردّت من سحيق زويِّر
لبّى سلام ٍ خارج بْعفويّه

باين على زولك لطيف وسيِّر
حيّاك وحيّا الزّول حيّه حيّه

يا بنت مشوارك مهوب قْصير
ونا احبّ افزع اذا لك نيّه

قالت تعرْف البيت .قلت آسيّر ؟
ضحكت ولبّاها تقل قمريّة

قالت هذاااك البيت . بيت نويّر
ونا اجيها وارجع العصريّة

قلت اوّل اتحرّاك كلّ عْصيّر
الحين ابا رابط من الظهريّة

كلمتها قالت قسم متغيِّر
خابرتك تْئذن لنا الفجريّة

يلعن ابو الاحراج , له يا سويّر
كذا صفقتيني بكوب الميّه

مار اسمعي بالله قول نْهيّر
لا تطلعين البيت يالحوريّة

كل البلى زولك لامرّ مسيِّر
يفتن امام المسجد و خآويّه

تعرفني وآنا بعلمها متحيِّر
وسمّيتها في ( فتنة الألفيّة )