مركب الشوق

لا مر طاريك وسمك جا على فمَّي
اتذكر ايام عشنا حبها السامي

ليام تسرق فرح قلبي على غمَّي
افراح قلبي خذتها مني ايامي

طال انتظاري وصبري مل من همَّي
ليه البطى يا حياتي ردي احلامي

يانور عيني غلاتِك ساكنه دمَّي
والقلب يالغاليه هايم بِك هيامي

امنتِك الله عودي يالغلا يمَّي
عطشان عطشان ونتي شربة الضامي

الهبني الشوق ضُمَّي خافقي ضُمَّي
بالهون ضُميه داوي جرحه الدامي

ليل العطاشا سريت الليل مهتمَّي
وصدور لوراق تنزف حبر لقلامي

مجروح حاولت الُم الجرح ما التمَّي
اسهر مع الجرح اقاسي شدة آلامي

يانسمة الشوق سمَّي الشوق لي سمَّي
يا مركب الشوق خُذني تعبت اقدامي

ريحانة الحب وانتي عطري وشمَّي
يا شاعر احساسي المغرم والهامي

يا ظالم القلب ريت انك على عمَّي
سجين حبك يسوقونه للعدامي