تــدور الليـالي - علي بن سران اليامي

تدور الليالي والليالي لها تأثير
على راس من عاشو بها الحزن والحسره

ولوشفتها تضحك وتلقاك بالتقدير
ترا القلب من غبن الليالي قضا صبره

نجامل مع العالم ونخشا يجي تقصير
ومن صد منا مانشدناه وش عذره

ونقبل عتب الأصحاب ونتابع التقرير
على شاشة التلفاز في موجز النشره

لاياصاحبي ردي عليكم مهو تبرير
أنا غيبتي برموز والرمز له شفره

نصحتك وحذرتك ولاينفع التحذير
ولافاد نصحي لك ولافادت العبّره

زهمتك بعالي الصوت وأدعيك قبل تصير
سوات الكسير اللي يدور على جبره

بغيتك على ظني وظني بمثلك غير
ودبرت ماسك خيط ومضيع الإبره

تأذن مع المذن وتسبقه في التكبير
توضي رجل والرجل الأخري بها غبره

خذيت لك منهج لحالك يبا التحرير
وشطبت منهج ناس فاقوك في الخبره

ياصاحبي والحر لاضاق شفه يطير
ويترك طمان القاع ويشرفه وكره

وسلامتكم,,,
© 2024 - موقع الشعر