بــطاقــة شــخـصـيــة - محمد المناعي

ماني من اللي بيتلبسه شيطان
ولا من اللي أرض عبقر وليده

ولا من اللي كيفه بشرب فنجان
وإلا من المقناص زاده يصيده

ولا من اللي ثار شعره كبركان
يحرق قصيد الخلق كله ويبيده

انا احضري آغوص في بحر قيفان
واصطاد لي حصه ودانه فريده

كيفي نسيم البحر والموج فنان
يعزف من ألحان الحياة السعيده

أشكي لبحري كلما صرت حزنان
بيني وبينه من صداقه وطيده

ولا أقول اجتزت حثلين راكان
وإلا أقول الشعر اصبحت سيده

الآن باسجل حضوري من الآن
امحمد بن اسعيد هذا قصيده

مسلم وأحمد ربّي ابكل عرفان
وحده ولا غيره وانا من عبيده

منّاعي امعرب عمامٍ وجدان
خوالي السيسي لكل فخر جيده

© 2024 - موقع الشعر