قديمات الامثال - علي بن سران اليامي

الوقت يصفق بي من الجال للجال
كن بيني وبينه مثار وطلابه

وقفت له وقفات الأحرار الأبطال
وسريت ليله والردى ماسرابه

خذيت منه فال ورديت له فال
وفاله دروسن زودتني صلابه

وأفرحت صدقاني وغميت الأنذال
ورقيت مرقابن هنى من رقابه

وماكل من يبغاه ذبه وله طال
كم واحدن دونه تردت ركابه

عندي طلوعه سهل والصعب منزال
والحر مايرضى يفارق هضابه

واليوم زاد الحمل والكتف شيال
والكل متشرهه ويرسل عتابه

تقسمو قسمين حاسد وختال
كلن يقاوس فسلته في ثيابه

شذابة العرقوب عبادة المال
من عاش عيشتهم خسارة شبابه

ذا الوقت ذكرني قديمات الأمثال
وتجارب الرجال صارت زهابه

ذكرت قول الزير في الناس وش قال
في بيته اللي هلهله بالربابه

لاتقول ذا عمن ولاتقول ذا خال
ولاتقول ذا اللي في القسا ينهقابه

الخال من يكفيك شر التحيال
والعم من يزهى جنابك جنابه

والهاجس اللي حدني له غثا البال
خطيت حرفه قبل نطوي كتابه

للصاحب اللي في الملازيم صمال
عون الرفيق اللي زمانه غدابه

تعثرت في الجو موجات الإرسال
وأبطى على نابيه وأبطى جوابه

الحال ياشاجع غدا مابقى حال
وياشيب عين اللي تزايد عذابه

والذيب له في مرقب الحيد مدهال
وإلي عوا لج لقنيبه ذيابه

© 2024 - موقع الشعر