ليتك على قلبي ولو مره تويق

ليتك على قلبي ولو مرّه تويق
وتشوف بعيونك غلاك ومكانك

بل بوصالك من غدا ناشف الريق
متعطّش لشوفك وودّه حنانك

شفت الوسيعه من بعد فرقتك ضيق
والضيق علّه ما يمّر بزمانك

ياللي بعيني غير كل المخاليق
رفيع قدر .. وعالي الشان شانك

أطيقك .. وغيرك من الناس ماطيق
الله على من يحسدونك أعانك

قصيدة ٍ لي جتك من غير تنسيق
من شاعر ٍ حبّك .. وفالك .. وصانك

تقدر تقول إنّه من قليب عشيّق
يموت فيك بقسوتك او ليانك

ماهو مثل بعض القلوب المطافيق
يهيم ... لكن لاتعدّيت خانك

منساك لوّك رحت غرب ٍ وتشريق
بعدك قفلت أبواب قلبي عشانك

هذي حروفي ياعسى فيكم تليق
وياليت أحبّك ... اسمعه من لسانك