موازين وقياس

الشعر له عندي موازين وقياس
لا بخس موازينه ولا انقص قياسه

اختار فن الشعر من معدن المأس
وانظم قصيدي من عناقيد مأسه

واستنتج الافكار من لبة الراس
احط من راسي على تاج راسه

اغوص فى بحوره الى قاعة الساس
واستخرج المرجان من قاع ساسه

اقطف من ازهور البساتين نعاس
الى تمايل وردها من نعاسه

اتعب على اللي يرضي النفس والناس
جزل(ن) وعّده بالمجالس وناسه

والشعرهاجس داخل النفس وحساس
يظهر به الشاعر خوافي حساسه

يا مكثر الشعار من كل الاجناس
كلا بمجهوده يريد الرياسه

شاعر قصيده بالدواوين نوماس
ياخذ لبيب الناس منّه دراسه

وشاعر حصيله مع هل الشعر لاباس
وشاعر ليا جاء صافي الشعر حاسه