يـــانـــــور عــيـنــي - سعد سعدي

الا يانور عيني لا تدور للغياب أعذار
ترى راع الجفا مانعذره لو كثرت أعذاره

تغيب وتبتعد عني وتكوي خافقي بالنار
وتسقيني بكاس البعد وتجرعني أمراره

وأنا لجلك مشيت الدرب لو إنه كثير أخطار
مشيت بدرب حبك مانشدتك وشهي أخطاره

أسج الرجل في دربك على المقبال والمدبار
أدورلي طرف علم(ن) تريح قلبي أخباره

أبي علم(ن) يريحني من الهوجاس والافكار
يريح راسي اللي مبتليته كثرت أفكاره

وش اللي صار من فرقاك ياكل الغلا وش صار
ضلوع الصدر واحدها يبي الشاره على جاره

وقلبي من مشاكلهم غدا في حالة إستنفار
قطع دمه عن الشريان من يمناه ويساره

وأنا حالي بعد فرقاك صارت شجب وإستنكار
ليامن قلت زانت ترسل الغاره ورى الغاره

عقب فرقاك ياخلي وأنا كني غريب الدار
غريب الدار غربله الزمان وضيع دياره

تجيني من بعد فرقا بضحكة طيش وإستهتار
وأنااعصابي بعد فرقاك تلفانه ومنهاره

تجي يمي وتسألني سؤال التايه المحتار
تقول تحبني؟ وأقول حبك كاتم أسراره

أحبك! إيه أحبك بس لاتسأل عن المقدار
لأنك لو جمعت الكون ماجا نصف مقداره

© 2024 - موقع الشعر