والله ماتسوى عند غيرك طعامـك

يالرجل كانك بالوفا شايع الصّيت
وبالطيب تعرف سمعتك واحترامك

مهما تعبت ورحت واقبلت واقفيت
تبغي مع العالم تحقّق مرامك

اللي يعرفك يعتني بك ليا جيت
ومن لايعرفك مايقدّر مقامك

ويالرّجل كانك بالمراجل تشقّيت
إفعل وتلقى الناس تنشر علامك

وإن كان بدروب المذلّه تماديت
والله ماتسوى عند غيرك طعامك

وإن كان في راس الطويله تعلّيت
اسفه حثال القول واحفظ سلامك

ترى الرجال تراقبك وين ماجيت
بأيْمنك ويسارك وخلفك وأمامك

ويالرّجل عز اللي يعينك ليا أزريت
ويشيل حملك كان كادك وضامك

ومن لاتحمّل زلّتك عندما أخطيت
لوْ هو حدا الإخوان وأبنا عمامك

جمعاه بدّلها فراق وتفاخيت
حيثك بقربه ماتهنّا منامك

تراك مع جار الرّدى ماتهنّيت
ضلام ليله جعل ماهو ضلامك

في ديرة تبعد عنه شيد البيت
وبعدك عن الأنذّال يطفي هيامك

قل له تراني عن جوارك تبريت
وحبل الرجا به مقضبك والتزامك

وإن كان في دنياك بالعز ما أوفيت
ماعقبها إلا الدود ياكل عضامك

وعلى النّبي مع من يصلون صلّيت
والخالق المجزي صلاتك صيامك