ونتي ونة اللي فـي مطاحـه صويـب

امس والبارحه واليوم يا اغلى حبيب
أتحرّى ولا جا منك رد العلام

ياعيون أشقر(ن) فوق النوايف ربيب
شاف طلع(ن) بعيد وحال دونه عسام

ويا بوجسم(ن) كما غصن(ن) ليانٍ رطيب
ويابو خدٍ كما برقٍ سمر بالضلام

تدري إني مريض القلب وانت الطبيب
واتصّبر وانا حالي براه الهيام

وإسمك امبرمجه في الذاكره مايغيب
واتخيّلك لوني غارقٍ في المنام

ونّتي ونّة اللي في مطاحه صويب
في نحور العدا وإصابته في العضام

وألتَفت ثم شاف أبوه بيدا الحريب
يضربه بالحسام وشال رأسه شمام

كان يا نور عيني ماحواك النصيب
اعتبرني على الدنيا حياتي عدام

مير أنا في رجا اللي سائِله مايخيب
ربنا اللي لنا بيّن حلال وحرام

يجمع الشمل لين ان الخواطر تطيب
ويتريّح فؤادٍ مبتليه الغرام