جرحتني وانـت الطبيـب المـداوي

لاباس ياسيد الغنادير لاباس
الله يعدّيك البلا والبلاوي

ياغايتي في البيض من بدّة الناس
انا الّذي قلبي لشوفك شفاوي

يابو عيون(ن) تسحر القلب نعّاس
سود(ن) هدبها كنّه الليل ضاوي

ويابو ثمان(ن) مثل عقد(ن) من الماس
جرحتني وانت الطبيب المداوي

ياضامر السرجوف ياعدم الأجناس
خذيت قلبي لك خوي(ن) مخاوي

بعدك طرف العين ماغض بنعاس
وانا لشوفك ياحبيبي رجاوي

أقضّي الأيام سجّه وهوجاس
حيثه كواني عقب فرقاك كاوي

وعروق قلبي يا اريش العين يبّاس
وعساك يالمملوح ترحم وتاوي

يابو جديل(ن) لاتحدّر من الرّاس
ذيل الكحيله في نهار العزاوي

أذكرك لامن جا من الشرق نسناس
تطري عليّه ياعيون النداوي

والختم كانك تفهم العلم بقياس
حقيقة(ن) ماعاد فيها ملاوي

أنت الذهب مايخلطه فض وانحاس
من يملكه يصبح ثري(ن) غناوي