ليلة البـــــــارح

ليلة البارح .. طواريها طواري
روحت بي شمال .. وعودة بي جنوب ..!

ليلة البارح طال فيها إنتظاري
بين صبري وشوقي .. ضيعتني الدروب ..!

بين عقلي وقلبي .. والعناد وقراري
دمعة ٍ من عناها .. ماتمل وتتوب ..!

بين هم المفارق .. والجفا بإختياري
خافق ٍ مد ّ روحه للعذاب مغصوب ..!

آآه واعمري اللي ضيعته المساري
راح ما كنْه إلا ريشة ٍ .. في هبوب ..!

قلت : ابجرح شعوره .. واسترد اعتباري
واستفزه .. عسى قلبه يحن ويذوب ..!

قلت : اببعد عساها للفنا .. والذواري
كل ذرة محبه .. مارعتّها القلوب ..!