ياويـش ياعنـق المذيعــه حليمــه

سر ياقلم واكتب عن الحب مالاق
في خطك الواضح جروح(ن) قديمه

القلب طير(ن) بين الاضلاع خفّاق
يكفخ ليا شاف الحباري مقيمه

وكره حدى الضلعين والعرق مسباق
شيخ الحرار اللي وصوفه عديمه

هدّيته انا اليوم مع وقت الاشراق
ولاذقت من طيري سوات الهزيمه

اقفى وخلاني على نار الاشواق
اهل دمع العين مثل اليتيمه

والله لو بيدي جفوني له رواق
من دون ذعذاع البراد ونسيمه

خدّه ليا شفته كما لوح برّاق
يجهر بنوره فالليال العتيمه

والعين عين اللي على الطلع مشتاق
طير(ن) وحش يبغى يلوف الوسيمه

وعنقه طغى زينه على بيض الاعناق
ياويش ياعنق المذيعه حليمه

والمبسم اللي لأعذب الحكي نطّاق
مازل في نطقه وقال النميمه

وخشمه كما سلّت سيوف(ن) لها ابراق
في كف من رد الغوازي سقيمه

وردفه رفع ثوبه عن ملامس السّاق
معروف لاهل العشق وصفه مهيمه

سبحان من هو للمخاليق خلاّق
ارها بزين(ن) فيه قدر وحشيمه

ماهو من اللي دايج(ن) وسط الاسواق
وعنده كلام الشات عيب وجريمه

ربّاه عود(ن) له فناجيل تنساق
وله مع هل العادات عاده كريمه