مــرثيـــه

البارحه دمعي على الخد همّال
سالت دموعي والعرب هاجعيني

ابكي على اللي راح له عدّة ليال
ويزيد مع زود الليالي ونيني

راح الذي بيته للأدنين مدهال
ريف الضيوف اللي يمد السميني

راع الجزيل مقلط(ن) كل رجّال
مايتبع الهزله يسار ويميني

عندي ترى يسوى ثلاثين خيّال
وياكثر من هو صار بعده حزيني

سعد سعد ياستر من تلبس الشّال
يرحمك رب(ن) للخلايق عويني

لايافهد هذا الزمن يمّكم مال
وبيت(ن) بلاعمدان ماهو حصيني

ياحملة(ن) تصعب على كل جمّال
اثنين جهّال(ن) يبون المعيني

عليه حزني بين الاضلاع يجتال
ماكني الا فاقد(ن) والديني

كنّه يشَبّه لي على بعض الازوال
ولاشفت (فهّودي) تزايد حنيني

العمر يفنى ويتغيّر بنا الحال
ويزول لو حتّى نعيشه سنيني

وحالي تغيّر وكثرت فيه الاهوال
من عقب موت اللي يبيّح كنيني

والله لو العمر يشرى بالاموال
لأشريه وارخص كل شي(ن) ثميني

ويالله ياعالم خفّيات الاحوال
ياخالق (ن) عبدك من اسباب طيني

يارب تجعل منزله خير منزال
ويسكن بعالي جنّة المؤمنيني

وترسل على قبره مزون(ن) مع (ا) خيال
وتنبت زهور(ن) تبهج الناظريني

يشوفها النّاظر لها الوان واشكال
من فوق قبر اللي سكن وسط عيني

صبّيت من شعري على الكيف فنجال
و.. أون والعبره تروح وتجيني