حصــان الأطـاليـب - محمدالعصيمي

العمر فاني والليالي تجاريب
والرابح اللي فالوغى يعتزابه

وانته تعلّيت المراقيب يالذيب
سيفك صقيل ولا تردّى نصابه

قبلان لاعدّوا خيار الاصاحيب
عدّه مع اهل المرجله والمهابه

ماهو من اللي لالفوه الاجانيب
من دونهم يدخل ثم يصك بابه

علمك وصلنا ياحصان الاطاليب
واطلقت فكري مبتدي في جوابه

والطير ماهدّوه لولا المخاليب
ولولا مخاليبه مايدمي صوابه

والنقش بيدين البنات الرعابيب
لاشافه المغوار يروي خضابه

وبعيرنا شال الحمول الاصاعيب
ماضاق من حملن بليله سرابه

لكن ياقبلان مانعلم الغيب
يمكن ظروفه ردّته عن جوابه

هذا وصلى الله على منبع الطيب
عداد ماخط القلم في كتابه

© 2024 - موقع الشعر