ســوق الرفايـع

الله انه لا... يعيدك يالرفايع
فيك من جدد جروح (ن) بي قديمه

طب وسط السوق شايل له بضايع
مادرى انه حط فالقلب الخريمه

فتنة (ن) ماشفت زيّه فالشرايع
ياروابي نجد .. والا ياقصيمه

مثل شرْد الصيد من حول المرايع
لاتذيّر من قنوص (ن) جت تهيمه

اقبلوا للريم من بين الفرايع
وجفلت والجيب ذيّرها وشيمه

والحقوها الطير محمود الصنايع
طير شيخ (ن) ماتضرّى بالهزيمه

ثم عطاها جولتين وعاد جايع
ما استفاد الا عواقبها الوخيمه

ليت قلبي تحفظه ضمن الودايع
دون تدري به.. مروّجْت النميمه

والله إني مغرم بعذب الطبايع
وارتجي وصل (ن) على نيّه سليمه

واوجودي وجْد من ذاق اللوايع
منكسر ويشوف قدامه غريمه

له زمان مذّوقه مر الجرايع
واكبر احلامه يخطط له جريمه

ولا لمحت ام العيون اللي وسايع
زانت اخلاقي على قدر وحشيمه

ثم كتبت من البيوت اللي روايع
وكفي الممدود في وصله كريمه