مرثية الملك فهد

القلب يحزن .. والدموع تسيل
والعين تسهر .. والغياب طويل

الفاجعة .. قضت مضاجع قلوبنا
وهمي أكبر .. والفؤاد عليل

حوادث الدنيا كفى الله شرها
يصبح بها الحمل الخفيف ثقيل

عقب ضحى الإثنين بالحيل راعنا
روعة خليل .. من فراق خليل

نهارنا شمسه خذت في غيومها
نصف النهار .. وكنها في ليل

غيبة فهد عنا .. مصابٍ مصيبنا
عسى النساء .. عقب الغريب تحيل

يارب ترحمنا وتلطف بحالنا
ماعاد فينا غير حيلك حيل

بالصبر والسلوان .. يارب مدنا
واجعل لنا على رضاك سبيل

تجبر عزانا في ملكنا زعيمنا
عساه بجنان النعيم نزيل

مرحوم يامن راح تشعب ركايبه
بدار الفنا .. عقب المقام رحيل

نذكر مواقف من ثبت في مواقفه
رجل الهدى .. للضايعين دليل

نعد .. ونضيع حصايل مناقبه
ونجيب من فيض الكثير قليل

مآثره تبقى .. ونلقى ضلالها
بالقيض عن لفح السموم مقيل

رجل البنا .. رجل الثناء في زعامته
زعامةٍ فيها عطاه جزيل

من ربع قرن وقايد العُرب مرتكي
للنايبات .. وللحمول يشيل

شيال حمل اللي تثنت قوايمه
بارك .. ومن مس الشداد هزيل

للواجبات منسفٍ عن سواعده
سيفٍ على حسم الأمور صقيل

غيثٍ على الممحل .. غيورٍ على الوطن
ماعال .. وان عال الخصيم يعيل

موتٍ اليا زمجر .. حياةٍ اليا ابتسم
يسف بأفواه الأعداه مليل

يوم اعتدى الغاشم وحوَّل بجارته
قال أنت ياهذا الغشيم هبيل

هي جارتي .. وآقف على الرجل دونها
وأنا لها بعد الوكيل .. وكيل

رد الحقوق .. وصبها في مسارها
فعل الأصيل .. من الجدود أصيل

قال انعمي ياكويت بالأمن واعمري
وأنا وراك .. ومن غزاك ذليل

ونادى بأهل لبنان .. والحرب دايره
حربٍ جنوا منها دمار وويل

جمّع طوايفهم .. وحدد قرارهم
للصلح بالطايف .. ولادة جيل

وفي قبة الصخرة .. وللقدس فزعته
يوم اختفى دون العميل عميل

من غض عن محنة فلسطين ناضره
يجمع لهم رجل السلام حصيل

وفالبوسنة والهرسك .. أحسن سياسته
عن خوفها جاب الأمان بديل

أمَّن محارمها .. وحصَّن حدودها
للمعضلات المبهمات .. قبيل

قبيلها .. وان كشرت له بنابها
يضحك لها .. ضحك الأسد بالحيل

ليث مخضرم .. مارس الجوع والرخا
ملك .. ولاله في الملوك مثيل

عمران مكة والمدينة .. شواهده
تفنى الليالي .. والجليل جليل

وبطباعة المصحف كبارٍ وهايبه
يمنى كريم .. ولايمين بخيل

ورد لنا الماء صافيٍ من منابعه
عذبٍ .. مثل نقع الصفا للسيل

كان العلم للعلم .. هذي معالمه
حرَّاب نوم .. وللعلوم صميل

أركى المدارس .. والفهارس دراسته
فراس زمان .. ومن خيار رعيل

يالله .. ياسامع دعاء رافع الدعاء
تفرش ترابه .. زعفران وهيل

يسقيه من نو الثريا همايله
وينبت عليه من الزهور اكليل

ترحم فهد .. وتعوضه عن جمايله
وترد لأصحاب الجميل .. جميل

ترك غثى الدنيا .. وفارق همومها
وخلى من أغلى المترفات .. حليل

للعز .. ياللي عضتنا في فقيدنا
ياللي لك التاريخ يصنع جيل

أنت العزاء .. ياعزنا .. في عزيزنا
تحيى لنا ياللي لأخوك زميل

زاملت أخوك بسيرته في مسيرته
مسيرةٍ عنها الضعيف يميل

نبايعك .. ونجدد البيع والولاء
بيعة رجال .. وللعهود كفيل

كفيلنا الله .. يوم نعطي عهودنا
لك يابطل .. ياشهم ياحلحيل

والبيع .. ماهو بيعة البيع والشراء
بيعة ملك .. ماهوب وزن وكيل

نعم السلف .. نعم الخلف .. عن سليفنا
واصل .. وطبق محمك التنزيل

حنا وراك .. نواصل السير والسرا
جديك شمال .. وفالجنوب سهيل

قايد .. ومن قدته على الخير خيرته
يارد على خيرك .. موارِد ريل

فيك الأخوه .. والمروه .. طبيعتك
وأصل الطبيعه .. من طبوع نبيل

سليل مجد .. مسلسلٍِ من سلالته
هذا العظيم .. من العظام سليل

رأيٍ اليا دبر .. شجاعٍ اليا اعتزى
صارم .. يبرد للكبود غليل

حزمٍ اليا صمم .. عزومٍ اليا نوى
من لاذ به .. يرقد وراه دخيل

عزمٍ اليا حاكَم .. عطوفٍ اليا عفى
ظله اليا انكف الضلال ضليل

ومبايعة سلطان .. للعهد واجبة
ولي عهد .. وللنظام كميل

سلطان خير .. وضايفاتٍٍ كميله
مضفي على ستر الديار شليل

عضيد عبدالله .. اليا هاجت العدى
أصهل ونعرات الحصان صهيل

برعاية الله .. ثابروا في كيانكم
ياذخر من يخلي سروج الخيل

نعم الموحد .. ماسهى عن رعيته
يهذل على خير الفلاح .. هذيل

ياراية التوحيد .. عيشي ورفرفي
الأصل ثابت .. والفروع نخيل

هذا وأنا للأرض والشعب منتمي
ورثي ومن ذاك الفصيل .. فصيل

فصايلٍ قامت على الدين والشرف
سرجٍ لحومات الظلام تزيل

قامت شريعتها وسادت شعوبها
رغمٍ عن أهل الكيد والتضليل