لا تضرب لرقاصة الحي

ما عاد لي في عيشة عشتها شف
ولا عاد لي في ما مضى مني حسوف

لا مصفق للفايته كف في كف
ولا ملوح للسانحة لي بكفوف

خليت لي ناس مع اشباهها تصف
عقب أصبحو ربعي مقامات وصفوف

ناس على الهامش مسوي لهم رف
وناس مسكنهم مع الروح بالجوف

لا تدور يا ثعيل السوالف ولا تلف
ما لك قرا عندي لو تلف وتحوف

دمعي على بعض اللي أغليتهم جف
ما عاد في قلبي معاليق ورفوف

شلعت عن قيض أكثر أصحابي عطف
ولبست لشتاهم على بردتي صوف

إن كان ما لبيبان خفاقك درف
خفق بك أبعد من مدى الصحو للشوف

لا تضرب لرقاصة الحي في دف
يضرب عليك الحي ما به من دفوف