الجادل اللي غلاها بين حدب الضلوع
ابطيت ماجاتني منها مراسيلها
شهرينّ.. لا والله الا اليوم عاشر ربوع
سبعين ليله وهذا الليل تكميلها
اقفت وقلبي على طول المفارق جزوع
وشلون تقفي وانا قلبي ينادي لها
غابت وشمس التلاقي مانوت بالطلوع
واجتاحت القلب غربه موحشٍ ليلها
من بعدها في عيوني تستكن الدموع
ولولا غلا دمعها بلت مناديها
صحيح جوع المشاعر ماهو ايات جوع
تضيق منه النفوس وينتهي حيلها
فقدت من فقدها والبعد عنها يروع
ومن بعدها شبت الفرقا قناديلها
الترفه اللي لها في وسط قلبي فزوع
دلة غلا يشرب العاشق فناجيلها
ان كان ترضى جموع ..ان كان تزعل جموع
مزيونةٍ بالحلا تامر على جيلها
فيها الحلا بالوصايف والحلا بالطبوع
تحتار فيها العقول وفي تفاصيها
في الشعر معنى الدجى.. في الخد معنى السطوع
وفي العين معنى الهلاك اللي جذبني لها
وفي الطول معنى شموخٍ مايعرف الخضوع
وفي البسمه التوت واللؤلؤ يغني لها
وانا اعترف بالقناع بس ماني قنوع
احزن على فراقها وارجي مواصيلها
مدري نوت بالرجوع او مانوت بالرجوع
ولا زلت اشيك على الجوال وايميلها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.