يآفكـر

لـ ، ، في غير مُحدد

يافكر قبل العام والعام منساح
كثر الطواري ما يهزك مهبه
داله ومستانس وطربن ومرتاح
مجزي ولا حسبت ربعه وغبه
واليوم غاديلك مناحي ومشواح
للغرب نبه واسفل السيف نبه
ماكنك الا حر يجذبه ملواح
واشوف حالك بين هبه وهبه
انكنت من فرقا المحبين بواح
وش حيلة افوادن تروى بحبه
بعد الجسد هين ولا بعد الارواح
عشق ومحبه من بداية مربه
الايام تكرم مر واوقات شحاح
والسيل بده ينقطع من مصبه
اتقول وش باقي ولاقلت وش راح
اتعبت حالك بين ظلعن وخبه
كان الغضي شفقن على الشوف لحاح
تعن صوبه مثل من ذكر طبه
غالي وطاغي في جماله وفضاح
جدايله ليل وبراق لبه
عين الوحَش عنق المها تاخذ ألماح
الزين شبه به وهو مايشبه
وكانه على فرقاك ماينس اجراح
ارفع مقامك من مقامه وكبه
تجارب العشاق تكفيك الانصاح
واذا دعا داعي المحبين لبه
الوقت طبعه ما يطول بالافراح
لبانت اثماره من العذق جبه
خل المحبه تشبه لنقش الالواح
متبينه باعلى طويلن تنبه
خلك فطن ميز منادي وصياح
درب الهوا حذرا يحوشك مطبه
يا فكر انا من بينكم صرت مصلاح
النار لو شبت وزنا مشبه
أحمس عليه الحب واجيد الانجاح
من دون ما نحرقه حبه وحبه
واليا ارتفع من دونها الموج سباح
اللول لجله غصت تسعين غبه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر