طيبي تعـدّى محلّـه

مشكور ياللى تملك الطِّيب كلّه
على الشّعور الصّادق الوافي الزّين

سيف المكارم في المعاني تسلّه
في كلّ حرفٍ مايبي له براهين

يا خوي أنا طيبي تعدّى محلّه
والكاش عند النّاس أفضل من الدّين

عمري أنا ماعشت عيشت مذلّه
أجنب إدروبٍ بها الذّل والشّين

العز رغبه ومن مشاله يدلّه
ماهوب ورثٍ بين حسّان وحسين

أحدٍ يشوف الطِّيب عيبٍ يتلّه
يندم على فعله بنقص الموازين

يزود من عنده على الطّين بلّه
راضي بعقله في عداد المجانين

وحدٍ يعدّه بين الأيام خلّه
يشيل قدره فوق راسه على العين