(( عتاب لأحد الاصحاب )) - الحميدي بن سعد السبيعي

يا لصاحب اللي خذاك إبليس في كمّه
أركد ولا تنجرف يا طير حوراني

وأبحث عن الحق لا تخطيه وتخمّه
ترى الركاده لها عند العرب شاني

وإن جاك نمام ينقل لك ولو نمّه
فقل أسترح لين أشوف العلم يا فلاني

لو كان للآش لا خاله ولا عمّه
ولا نتب عن الحق يا رجال عمياني

الحق يا صاحبي في ذمتي ذمّه
مايجهله غير من يغويه شيطاني

أمّا من الأنس وألا الجن يختمّه
ويحط له بالردى منهج وعنواني

لكن بعطيك رأيي كان بتضمّه
جنّب عن اللآش لا يلحقك نقصاني

جنّب عن اللآش لا يا تيك بمطمّه
وتخسر مكانتك عند أطوال لأيماني

وخاو الذي خوّته ترقيك للقمّه
ترى الخوي يا فتى له دور وكداني

أمّا تعليت وألا طحت با لجمّه
ومن طاح ما ينفعه ربع ٍ وخلاني

من طاح يا صاحبي كل ٍ ترى ذمّه
يصبح هدف للبشر لأقصين والداني

هاذي نصيحة من اللي وضعك أيهمّه
سطرتها لجل عينك يا كحيلاني

سطرتها وأبتدي الموضوع وأتمّه
من هاجس ٍ للمعاني دوم طرباني

يطرب لعز الصديق وللعدو سِمّه
سِم يعيق العدو لا مال عقباني

أكويه قدم العرب والناس ملتمّه
ولا همّني من يشيل السيف شاما ني

سيفي صقيل ٍ يقص الرأس ويزمّه
ويداوي الشره كان إنه تحداني

والصادق اللي يعد الصدق ما همّه
قول الحقيقة يعدّه وين ما كاني

وصلاة ربي على المبعوث للأمّه
محمد المصطفى من نسل عدناني

© 2024 - موقع الشعر