ما هقيت إن المحبه لها سيف(ن) سنين
لين ما قامت بعظمي إتسن سيوفها
يا (سيوق الشوق) خفي علي لا ترتكين
طالبش لا تذبحيني قبل ما اشوفها
كلما جريت صوتي.. تلاحقه الونين!
وكلما هديت روحي.. تزايد خوفها!
الشتا/ والليل/ والشوق.. سم العاشقين
وكلها قامت بصدري إتدك صفوفها
والقلم ضم الورق.. لين بيح بالكنين
والقصايد مدميه بالغياب حروفها
يا خفوقي لو تميل الليالي والسنين
وانت خابر ضيم بقعا.. وجور صدوفها
عشرة(ن) فيها الوفا والمحبه والحنين
لا غدى ممساي قبري.. يجوز اعوفها
حبها طابع بقلبي وفي عيني سجين
ووين ما لديت عيني اشوف طيوفها
يا عسى تسلم يسار(ن) تلوت باليمين
ويا عساني ما اتوفّى قبل لا اشوفها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين