من عزوة ال قويد من مارث قويد

في ليلةٍ عندي كما ليلة العيد
عبّرت عن مكنون قلبي وخافيه

سلام نبدي به على كل صنديد
في محفلٍ جينا على شان راعيه

(محمد المرّان) قرم الأواليد
اللي تشجعنا فعوله وطاريه

قرمٍ يشاف ليا هفا كل هربيد
والطيب في وجهه تبيّن مواريه

في كل يوم يجدد الطيب تجديد
وعلى سنام المجد ثبّت مبانيه

شيخٍ يشيّد ساس الأمجاد تشييد
ونزيه عرض من الردى والمشاريه

يا بعد دربه عند دروب المناقيد
الطيب طبعه والردى ما يدانيه

كريم كف وبالحجج والمواريد
طلق اللسان وطيب ساسه ممضيه

من عزوة (ال قويد) من مارث قويد
من (لاد مسعر) لا دعا الحرب داعيه

ثم اعتلوا قبٍ كما شرّ الصيد
تحمى صخاف الشول لا هج تاليه

قوم تورد حدب الأسياف توريد
ولا يزعزع طرشهم من مفاليه

ولا خير في هرجٍ على غير توكيد
والصدق يعجب سامعينه وملقيه

وايضا بعد بكرر المدح واعيد
(لمحمد) اللي يكسب الطيب بيديه

من طيب ابوه اللي خذا الطيب له فيد
اللي على كل المراجل مضريه

وخواله اللي تكسب الطيب وتزيد
(لاد المنيعي) كم حريبٍ توطيه

ساس الظفر لامن شرد كل رعديد
وزبن الدخيل اللي كبارًا بلاويه

وان جا نهارٍ فيه قدح البواريد
ميقافهم كلٍ يعرفه ويوحيه

وصلوا عدد ماغرد الورق تغريد
على رسولٍ منهج الحق ماشيه