عام الفيـن

عام الفين وثلاثه واربعه عطني يديك
ياحبيبٍ صار حبك في هواي اخر موديل

بس قبل تموت فيني صح ولا اموت فيك
خذ شروطي فالمحبه لا توهق ياجميل

شرطي الاول سؤال موجهه مني اليك
فالبدايه هل تحملني ترى دمي ثقيل

وشرطي الثاني ما ابيك تحط مع حبي شريك
والعهد والله ما ادوّر فيك يالغالي بديل

وشرطي الثالث ما ابيك تشوف نفسك بل ابيك
شخص متواضع ولو بالزين ما مثلك مثيل

وشرطي الرابع نواصل ترتجيني وارتجيك
فالحياه ان كان ربي مدنا عمرٍ طويل

وشرطي الخامس وعدنا يحتريني واحتريك
بالامانه والميانه فالكثير وفالقليل

وشرطي السادس لا تسمع هرج ذاك وهرج ذيك
ولا خلك مع حبايب قوم قال وقوم قيل

وشرطي السابع اذا ردتني ظروفي ما اجيك
لا تشك ولا تعاتبني تراي اوفى خليل

بعد هاذي كلها بالروح والعمر اشتريك
لا جل نضرب اروع الامثال جيلٍ بعد جيل

بس لو ازعل عليك اموت ما ارضى عليك
انا لا قفيت يالغالي رجوعي مستحيل