ليل النعيريه

أخير ماقيل قبل النظم وأشعاره
وأفضل كلام البشر سرّه وجهريه

ذكر الله وحمده وتسبيح بأذكاره
وأزكى صلاةٍ على المختار مقريه

محمد وآله وصحبه صفوة أخياره
ماناح فوق الغصون الخضر قمريه

والليله السعد بان وشعت أنواره
ما يشبهك ليل يا ليل النعيريه

برعاية أمير نسل أمير واماره
قدره كبير وكبيرٍ من كباريه

كريم سبلا تشب النار من ناره
تزهى جبيه مواري الطيب ماريه

بالطيب نسمع علومه عمت أقطاره
ماهي بديعه فعول أجداد فخريه

ترثة بني زيد ساس المجد وجداره
مجدٍ مسيس ماهيب أمجاد عاريه

من نسل قحطان وأصل العز وكباره
كواكب عاليه ونجوم دريه

جده "سليمان" وعلم المرجله كاره
ورّث فعال الفخر وأعمال خيريه

و"عمير" خاله ربيع الضيف مع جاره
ذريةٍ طيبه من نسل ذريه

والليله الشعر روضٍ بأقطف أزهاره
واللي حضر يبشر بنفحات عطريه

للشعر حقٍ عليه أرفع شعاره
مبدأ وشيمه ماهي شطحات فكريه

أنقى معانيه نقو العود عطاره
مكاسر العود غاليةٍ مشاريه

قافه .. وبحره.. وسبكه.. حبكة أفكاره
هذا إختصاصي ولي خلطات سريه

ما أقول أنا اللي وصل في الشعر مشواره
لكن ما أهاب من مسرى غداريه

وشعرٍ بلا مرجله يا مكثر أضراره
وآخر زمنا طلع شعّار خكريه

حمره ومكياج ويمكن يلبس سواره
ويقال نهجه لنا نقله حضاريه

الشعر في وضع مزري تابع أخباره
وياكم مجله تسمى ظلم " شعريه"

الشعر تالي زمانه أصبح تجاره
وكلن يبي يكسب بصفقه تجاريه

ويا ليل وجهك سعد ومشعشع انواره
ما يشبهك ليل يا ليل النعيريه