الوزه المبرقعه

يا عين شيهانٍ على الوكر مرتز
ماخاب صقارٍ على الوكر رزه

أشعلت قلبي نار وأنا أتعزز
وما يجتمع بالقلب حبٍ وعزه

"عد" الهوى لو غاض..لا بد وينز
ويبقى الغلا مابين نزحه ونزه

حب النقا والطيب لا بد يبرز
حبٍ على المكشوف مافيه برزه

أهفيت حبٍ قد رفعناه في عز
يا شين غدر الصاحب اللي تعزه

شد الغرام اللي بقلبي تمركز
وبيرق غرامك طاح من عقب ركزه

وأوراقكم يا"زين" لا بد تفرز
وتنشر نتايجها بعد كل فرزه

وفيروس حبك بأنزعه لو تلزز
وأستخرجه لو هو بعيدٍ ملزه

وأنزع غرامٍ داخل الجوف يغرز
وأشق صدري لو ثمانين غرزه

شجرة غرامك مالها غير تنجز
والله ياعرقٍ نبض لك لأجزه

ولو مرني طاريك والله مافز
قلبي ولو حتى تقول: ( أستفزه)

"خيلي" امعودها على الطرد واللز
لا تنخدع بحصانك اللي تلزه

محدٍ يعاف "الحر" ويبرقع "الوز"
يربط سبوق الطير في ساق "وزه"

"سيفٍ" صقيلٍ لكن القلب مهتز
والسيف فعله من يد اللي يهزه

تم الكلام الي بنيته على "إز"
قافٍ على "إزٍ" وقافٍ على "إزه"