أربع .... لابد منها - سعيد الحمالي

الموت والعلة وسلاّل الكبود
لاحدتك الأيام للنذل الدني

ماني غشيمٍ فيه لكنّ محدود
حسبي على ظرفٍ لمثله حدني

ياجعل يومٍ ساقني له مايعود
وياليت ربي من مراحي لدني

لوكان صاحب جاه وإنسان معدود
مستغني عنه ورزقي سدني

العام يزهمني و أقول:إرقى سنود
والله ما تقول "الحمالي" ردني

واليوم رد الطيب نكران وصدود
يقول مقدر والنظام يحدني

ياجعل جنسه في الأوادم مايزود
محزم فشل ماأشدّه ولا شدني

الصاحب اللي لا بدا اللازم يحود
ماعدّه من أصحابي ولاعدني

أميّز القلب النقي امن الحقود
واللي تودّد كذب ...واللي ودني

ولوكان تبعدنا المسافةوالجدود
القرم أحبه لو بسيفه قدني

والأربع اللي كل شخص الها محدود
لابد تصدفها.. وأنا لابدني

كيد الحسود... و... رد فضلك بالجحود
خوة ردي...و...حاجة النذل الدني

الأوله, .. لابد من كيد الحسود
تلقى الحسد في البدو والمتمدني

والثانية, .. يجزى جميلك بالجحود
اللي بعيدٍ يجحدك واللي دني

والثالثة, .. خوة ردي ما منه فود
تحدك الأيام له وتحدني

والرابعة, .. لوتملك اللي في الوجود
لابد ماتحتاج ..للنذل الدني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر