لا خاب ظني - راشد بالكندي

لا خاب ظني فيك ولا ظن لي صاب
تبغي حضوري ولايهمك غيابي

غريب طبعك غامضٍ كلك اعجاب
مدري تهمك راحتي او عذابي

تفتح بوجهي باب وتقفل أبواب
صار الخطأ جايز وجاز الصوابي

ودي أعرف أسباب وصلك والغياب
ابجاه رب البيت عطني جوابي

ان كان لك غيري من الناس أحباب
قلي عشان أكون حاسب حسابي

وان كنت خايف ألحقك لوم وعتاب
والله ما يلحقك لوم وعتابي

تدري مكانك بين جفني ولهداب
وتدري بغلاتك يالغلا وانعجابي

قول الصراحه لو على قطع لرقاب
فسر كتابك ولا تخليه غابي

لو طاب جرح القدس بي جرح ماطاب
ولا ظن غيرك عارفٍ طب مابي

يما تعزف الحب لي عزف زرياب
ولا انسحب أرجوك وارحم شبابي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر