تــلاحــق شــــاعـــــرك - مشعل الشايقي

حبيبي من هو فكري يوم هجه
وهواجيسي جعلها له هجاجي

سوا حبك ولا رعبوب فجه
فكر شاعر حبيبي لك فجاجي

ولا به قبل حبك حب رجه
فؤادٍ لا خفق جاب ارتجاجي

ابوك اسمع صدر مليان صجه
تحسب القلب يركض فوق صاجي

مطر من غبت جوي صار عجه
اخايل غيثك ايهجد عجاجي

من اقفيت الفكر به دوم سجه
تقل منجوم ضايع ليل ساجي

خيالك وجهتي من وين وجه
ونار الشوق في صدري اجاجي

و انا من كثر طيفك دمع زجه
كأن الكون في عيني زجاجي

وصدى صوت امس له بالسمع لجه
يلج الليل كنه صوت لاجي

ومن النبرات قلبي فيه خجه
وكم صوتٍ ادور به خراجي

مرار الهم فهم الوقت مجه
على نبع الفرح واصبح هماجي

عذلت القلب جيت بكل حجه
ابي اغفا خفق رفض احتجاجي

عليك الله مقرون الاحجه
ترجع بسمتي تفرد حجاجي

ترى حالي بعد قفيت دجه
ادج دروب فيها الطيف داجي

وإلى مني ذكرت اللي ترجه
من الدوخه حسبت الكون راجي

واحس الراس فكري فاس شجه
وهذي حال من يسهرك شاجي

تلاحق شاعرك بالوصل نجه
تحت انقاض هجرك صاح ناجي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر