بغـداد

بغداد .. منْك المعذره والصفْح لا صرتي حطام
واحْنا انتفرّج حالنا حال الشعوب البايده

القدس وهْي القدس تصرخ تسعه وخمسين عام
وشلون اجل ترجين يا بغداد .. منّا فايده؟

يا قهر "ابو جعفر" على ماصار في "دار السلام"
والقهر الاعظم "خير أمه أُخرجت" متكايده

والوضع ماهو بحاجة استنكار أو شجْب وكلام
المره هذي .. جرعة التجريح فينا زايده

والحقّ لو ينقال قيل: المشكله نفس النظام
وش ذنب شعب ٍ تُنتهك أرضه بسبّة قايده

والعالم المكتظّ فوضى عارمه وشحْن وخصام
يستنكرون البعض منهم .. والكثير مْحايده

والله لنْ ترضى النصارى واليهود .. ولا تنام
حتى تصير المسْكنه والذِلّ فينا سايده

الله يا مجد العرب وايّام كان الشام .. شام
أيامها كانت جيوش المسلمين .. الكايده

الحين ما غير انتبادل بالشتايم .. والملام
بْوضعنا من حقّ "واشنطن" تكون الرايده

صرنا هدفْها .. والدليل انّه إذا حان الطعام
تتقدّم ارواح العرب والمسلمين .. المايده

حاجه تجيب العار والفشْله وتمنحنا وسام
أفقر شعوب الأرض لو معنا الدراهم وايده

والفقر .. فقر المجد والعزّه وتاريخ العِظام
اللي بنوا الماضي التليد .. وماقدرنا نْعايده

بغداد .. آسف بس انا مضطر اصرّح في الختام
إنّا عرب .. والكارثه ما من ورانا فايده