غرام

غرام لا لا وانا مالي ومال الغرام
قلبي لو يغوص في بحر الغرام اغرقه

وانا اسمع الناس قالوا للمحبه سهام
والله ما عرض لها قلي واجي بدرقه

اخاف قلبي يصارع بين شوق وهيام
ويسرقني الوقت عمري والامل يسرقه

خلاص والقلب شام عن امهات الوشام
لو جاد وقتي علي من الجمال اطرقه

ما يغري القمري ان غرد وناح الحمام
ربيع عمري خريفه حت كل ورقه

ارجوك يا عاذلي كف العتب والملام
من يطبخ الفاس لايرجي وراه مرقه

يا قلب هون عن اهزانك ويا جفن نام
الدمع ما هوب بالساهل يهون ازرقه

كنت احسب ان الحمامه صدق رمز السلام
لين ابتدت سطوة السندان والمطرقه

والحب للشعر ملجا والمنابر زحام
هو اعذبه اكذبه والا اصدقه واعرقه

وش قيمة النور لو لا عسعسات الظلام
وش قيمة الطيب لو بالجمر ما نحرقه

والعز ثوب لبسته والكرامه وسام
شاعر وغيري بلع ريقه غبن واشرقه

علمني الشعر والشاعر وسيلة اعلام
لسان حال امته وهمومها تؤرقه

وفي الشعر حكمه وكلمه مثل حد الحسام
واشعارنا فى غصون اعمارنا مؤرقه

والشعر نبع المشاعر غير كل الكلام
ما يملكه كل من يملك قلم وورقه

وليارسمت القصيده مثل بدر التمام
من بفتح الباب والا السوم من يفرقه

تبين وجه الحقيقه لو يناط اللثام
الكون كله بزوغ الشمس من مشرقه

ما يرخص الشعر والدنيا بعيني حطام
جف القلم واستحى وجهي وسال عرقه

وان قال الله وطال العمر والحظ قام
اسمي على هامة الشعر ارتفع بيرقه