ياللي تجر الخطاويــ... - سلطان بن دحيم العطاوي

ياللي تجر الخطاوي والليالي طوال
جاوب على نشدة الناشد ولد النظر

في المنزل اللي حلاله ما يسمى حلال
وعشبه يقطر من الافلاس دم حمر

هاذي شواهد وخل أم الدلع والدلال
تاخذ من الود ما يشفي جنون البقر

وأتركني أشفي غليل الوقت واشرب زلال
في عالي الرجم واتفيا ظلال الشجر

لو أني أدري تلايم هالثنينه محال
مثل أختلاف المذاهب واختلاف البشر

البارحه همي أطرق بي وزمل وطال
وعافت عيوني لذيذ النوم لين الفجر

واقبلت اجر اللحون اللي تهز الجبال
لين أغرقت عيني الحمرا سيول العبر

واصبحت مقتول هم وعبرتي لا تزال
في محجر العين تلمع مثل لون الحبر

عليك ياللي صوابك في ضلوعي إجلال
ياللي شبرت الضلوع العوج حب وشبر

خليتني في الدروب القشر روح وتعال
واقفيت لا علم جاني منك وآلا خبر

وانا خويك رفيق الليل راف الخمال
منادم الهوج سيد قوم شوخ وجبر

عطني من الود ما يترك لقلبي مجال
يشتاق للصوت والضحكات همس ونبر

واسرج لي الوصل واقرب لا يموت الوصال
واموت من حبك الطاهر ولا القى قبر

هذا كلامي وقلته والليالي طوال
والقلب دم حمر والقلب لاجلك خضر

© 2024 - موقع الشعر