الا يا قلبي - مفرح بن رجعان الهرشاني

الا يا قلبي ياللي من هواجيس الضحى وني
اليا منه طرالي ما طرالي ضاع برهانه

مثل حنت قير اثنين والخمسين لي حني
واهو حمله ثقيل وضاربن له قاع هشتانه

طمع راعيه بالكروه وزاد الحمل بالطني
تناوش نمرت الواحد وذبه وافخت الخانه

تعرضله دعابيلن مكيداتن يبذني
غفل عنه الدريول لين حاش الرمل ذرعانه

عقب ما قرز الموتر تمنى السايق الفني
عرف نفسه غشيم ولا ضبط لفات سكانه

قعد هو والمعاون في مكان ٍ يخلف الضني
يحيلونه وعيت تركب الويلات صيجانه

على زول من الازوال لا منه ولا مني
جرى من بيني وبينه حدث واغواه شيطانه

الا ياليت من يدري وش اللي غيره عني
ابا اماشيه حق الله وكل ٍ دون وجدانه

عشير ٍ ماخذلي مدت ٍ وياه متهني
ابو عين ٍ مثل عين الوحش لا هز جنحانه

انهود ٍ لا تفافيح ٍ ولا تين ٍ يحلني
تبايضهن تحامرهن تهاوش فيهن الوانه

تطلق فوقه ٍ شقر ٍ على الجمول يضفني
مثل ما قال بن لعبون خانه فوقها خانه

اليا منه تبلد بالثنايه واظهر السني
حدر حمر الشفايا قلت للخلاق سبحانه

على هاك الخدود اللي بليا ورد يوضني
وخشمه سلت الهندي وخط الحبر حجانه

انا لينه طرى عيا ً عظامي لا يشيلني
كبر وردوف ونفس حاشته مهي بخسرانه

انا لوني عمى جنس العذارى ما يغرني
يقولون المجرب جد غلب دختور دوخانه

© 2024 - موقع الشعر