يابو سعد نفسـي تحـب الفياحـي - عايش مرزوق الجويسري

يابو سعد نفسي تحب الفياحي
أخير من قصرٍ براده بتكييف

يادجت بالي والضمير استراحي
اخص به ياصرت ماني على السيف

ليا حصل خدٍ عن السيف ناحي
يم الغدف ومع ايسرا التل وطريف

بالحزم والعيثه وذيك المناحي
خدٍ غني العرف عن كل تعريف

هو منوتي يوم اشهب القيض راحي
ياجا البراد ووايقوا بالمشاريف

مثل السنين اللي تقافن ملاحي
ياحلو دورايا مهن بالتصاريف

سنين فيهن للفؤاء انشراحي
صيد وشباب وكل شيِّ على الكيف

واليوم كل اللي ذكرناه ماحي
وين الشجر والصيد والكيف والريف

والقاع كنك قالبه بالمساحي
عقب الشجر بفروع ذيك القفاقيف

بفروع وديان تربي الطياحي
ومدهال بدوٍ يتعبون المواليف

ياخايلوا برقٍ من الوسم لاحي
شالم وحالم والرعايا خواطيف

من صبح مخلين الوطن والمراحي
عزي لكم يا طاردين الغطاريف

من دونهم زم السراب البراحي
ولا ينزلون الا العصير الطهيريف

يبون سيلٍ بأول الوسم طاحي
وبله حقوق وممطر له على صيف

عدو بهن يمه خباثن شحاحي
وقل المواجه وافلسن الملاقيف

مير استريحوا ياطيور الفلاحي
لاتتعبون نفوسكم بالتحاسيف

قلته وانا معاد يكفخ جناحي
معناي غير وقلتها حذف توهيف

معناي يم الطير جعله يصاحي
الارض بيضا وابرق الريش ماشيف

من اولٍ نلقاه عصر وصباحي
واليوم عنه نحّلف القاع تحليف

قضوا عليه امطردين السلاحي
حتى أم سالم نتفوها تناتيف

وقل الحلا واصفي الغدير القراحي
والذاهبة معاد تسوي تكاليف

يومنها جيشان والعزم صاحي
نسري وننسى لابسات النفانيف

تلقى لنا مع خط خرنج مراحي
درب القنوص اهل الفرا بالشفاشيف

واليوم هوّنا وطاح السّلاحي
شايف وعايف والركايب مناكيف

ابطلب الله رحمته والمباحي
عساي له ضيفٍ وهو يرزق الضيف

تمت وصلوا عد سحب الرواحي
على شفيعٍ حطم الشرك بالسيف

© 2024 - موقع الشعر