ياجاهل الأوضاع هالوقت ذا غير
لاتحسبن كل اليالي عوافي
لابد ماياتي على القاع تأثير
ولابد ماتمشي عليها السوافي
حلم العرب ماعاد يحتاج تفسير
خلاص بيّن للعرب كل خافي
راح الزناتي وابن عدوان والزير
ماعاد باقي إلا مسلسل خرافي
ماشفت ويش يصير ويصير ويصير
شق دها ماعاد يرفاه رافي
شي جرى تحتار فيه التعابير
ماباقي إلا رحمة الله ياكافي
يالله يامنشي المزون المزابير
ياوالي ظله على الخلق ضافي
ياغافر الزله ويارازق الطير
ياعالم اللي صار والكل غافي
تعافي وتعفي وتنجي هل الخير
من الحسد من بينهم والتجافي
وتهدي قلوب اهل الوجيه المسافير
اللي لهم عند اللوازم وقافي
أحنهم لاشفت بالدين تقصير
إلى غدى طيب وكافي ووافي
رجلً إلى حدت عليه المقادير
ثم وصله المحتاج يوعد ويافي
ورجل بحجانه تشوف التباشير
قلبه مع الأدنى والأقصين صافي
ورجل كريم مايحسب المخاسير
ماسمعوا الجيران منه عجافي
وياوالي بأمره جميع التدابير
تعطي الجزل لو كان بدع القوافي
ياغافر الزله ويارازق الطير
يالله طلبناك الستر والعوافي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين