من قال بعناك. لـ نورة الشبيلي

من قال بعناك - نورة الشبيلي

وقف وناظرلمي.. واسمع كلامي
لي ساعةٍ في ها المكان اتحرّاك

سلّم وشف سر الزعل في سلامي
وقلّي وش اسباب الخطا لاعدمناك

ما اصدّق.. انك راضيٍ با تهامي
وساكت على من يزرع الشك بحماك

واللي جرحني منك.. واقلق منامي
وخلاّني اشره .. طول.. صدّك وجفواك

محال انزّل للعواذل مقامي
قد حاولوا.. تكديرحبي.. لطرياك

لقياك إلى ها لحين غاية مرامي
وشلون ابيعك ؟؟ قلّي من قال بعناك؟؟

يحق لي ازعل انا من ملامي
ولولاك نور العين ما جيت لرضاك

ما اصدّق.. انك ما فهمت اهتمامي
والا ارتباكي.. كلما تقرب اخطاك

ولامن سمعت اسمك تضيع الاسامي
غصبٍ علي.. يفز قلبي.. للقياك

مقدر أداري لهفتي في سلامي
وش فرحتي الامن تبسّم.. محياك

وانت بصراحة تستحق احترامي
دام الوفا يا صاحبي من مزاياك

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.