عينـي تراعـي

عيني تراعي كل نجم وتعده
وصار السهر عندي مزاج وطبيعة

القلب هومات المنايا تشده
ترسل عليه من السهوم الهزيعة

كني دريكٍ بيَّح الوقت سده
حمله ثقيل ولا قدر يستطيعه

كلَّه من اللي طال هجره وصده
الي نواني بالجفا والقطيعه

صد وتغلَّى ما أعترف بالموده
وأقفى به عناده وزيَّن صنيعه

حتَّى غروره راهي الحيل هدّه
وضاقت عليه من الغرور الوسيعه

أحاول أقطع كل عرق ٍ يودّه
لو كانت الفرقا ! وفاة ٍ شنيعه

المشكلة ! لا جيت أبا أصير ضدّه
وأقول هذا الشخص لحد ٍ يطيعه

سلهمْ بهاك العين ، وأشّر بيدَّه
كنَّه يقول : اللي هويته تبيعه ؟

وضاعت علومي وأرتخت كل شدّه
وضعت ونسيت العزم وأصبحت أطيعه

وسبَّة ضياعي شامة ٍ فوق خدَّه
لو شافها الكافر دخل في الشريعة

وختامها : صبري وقف عند حدَّه
وأقول حبَّه (( دائماً في الطليعة ))