للظروف أحكــام .....!!

لولا ظروفي واعرف انك مقدرها
ماردني عن مجيك ظرفي العادي

عندي ظروف قويه ماتصورها
أعبر من ظروف فلوجه وبغدادي

وانا ظروف الزمن ماني بحاقرها
كم واحدً في الجبل وأمسى على الوادي

نصبر على الوقت لين الله يغيرها
من عقب الازعاج يصبح جونا هادي

ننهض لناسً وناسً مانعبرها
ماهو تكبر لكن معبره غادي

أضحك على جملة الخمه ودحدرها
خل الردي لا تمذرع يطرق العادي

واحرص على رفقة النشمي وعمرها
وأصدق وكثر معاريفك للاجوادي

دنيا عجيبه وتبغي من يسايرها
آخذ وعطا وارتياح وصبر وجهادي

مادامت الروح رجليني تسيرها
ازيارتك حق ماعنها تصدادي

أشفق على جيتك وادفع بشايرها
والله ياشوفك انه ثالث اعيادي

معزتك عامرً في القلب زاهرها
مازعزع اركونها المده والابعادي

لا يابعد عالمن تركز مناخرها
لا زارها اللي حداه أمن الدهر حادي

مالت على حاشيتها وش مصبرها
ماترمح الهون وتدور للامجادي

تشهر كما اللي على لحق الخريش أرها
وتحط روس الجبال الشم ميعادي

وش ينفع اللي طموحاته مكسرها
يموت مافيد في الدنيا ولا فادي

جعله فدى اللي على الهين موعرها
غيث الهلاكا ومنصا ضيف وسنادي

وان قامت اهل الحجج تزبد حناجرها
تواعدو به وطاعو رايه القادي

وان جات زلت رفيقه مايكبرها
قدام مايلتفت لاهل التلدادي

من قبلنا عالمً نمشي على ثرها
مهما وصلنا النهايه جوف الالحادي

رحمتك يالله نفسي لا تخسرها
في حزتً مايسر الاب لولادي