رايح وطي

توّ ماجيتي وخلّيتي العاشق وطي
كيف لو ترخين عن نور خدّك برقعه

والله انّ الزين غيرك ولو زان خرطي
لو كبر مثل اربعه نقّصوا منها اربعه

ياهنوف الروح مما عطاك الله عطي
عاشق كل مابغى يذكر اسمه ضيّعه

احمر التفّاح والا من الحلو اصفطي
لمخطوف من عظم فرحته عضّ اصبعه

واقلطي في مجلس الصدر يا بنت اقلطي
لعنبو من لا فرش لك من الصدر اضلعه

وفي بساط من حنايا ضلوعي بسّطي
مجلس ما نجتمع به لابو من جمّعه

ونشّطي روحي بذايب أنينك نشّطي
قالوا ان الميت يحيى عقب ما يسمعه

ورقّصيني فوق خصرك وهدي وامغطي
ويش فيها لالتوى والتوى قلبي معه

واعصري لي من قراح الشفايف واخلطي
زنجبيل سلسبيل عليل منبعه

واكنبيني كلمة في ثمانك واشخطي
وكان جرحي مابرى عقبها وش ينفعه؟

مابغيت آصدّق اني معك رايح وطي
لين شفت العين ترسمك ظلّ وتتبعه