لا تاخذ القلب

لا تاخذ القلب رد القلب يا قلبي
وشلون تبغي يعيش اللي معك قلبه

كانك نويت الرحيل بقلبي ارحل بي
خذ صاحب القلب هو والقلب وارحل به

لو في جهنم نويت المنزل انزل بي
يرتاح قلبي ولو بالنار تنزل به

خل الوفا من طباعك لا تمنذل بي
حدد حبيبك وحدد من تمنذل به

منك الجفا طال والولوال طول بي
وقلبي عذابك توحد به وطول به

اليا متى وانت ضدي موقفك سلبي
واليا متى وانت عقلي ناوي سلبه

واليا متى الهم يقفي بي ويقبل بي
ودنياي قفت وعيا الحظ يقبل به

واليا متى وانت بالموعد تماطل بي
حرام منهو يبي قربك تماطل به

يا ليتني ملك تملكني وتبخل بي
ياللي تمر وصباح الخير تبخل به

اقتلني افضل ولا للحب تقتل بي
ما اعيش انا بارض شفت الحب يقتل به

لا تقتل الحب واقتلني ومثل بي
وقدام كل البشر منصور مثل به