ياخايـفـه مـنـي وانــا مـنـك مـرتــاب - ممدوح عبدالله المرزوقي

ياخايفه مني وانا منك مرتاب
مزروع دون الوصل خوفن وريبه

مضى علي الليل واقف على الباب
وانتي مع الشباك عينك رقيبه

وهذي سوات الحب مابين الاغراب
انا غريبن عنك وانتي غريبه

اتوق مير الخوف من ذنب وعقاب
ومن الزمان اللي طعني نديبه

ياهيه لو لايه من الخلق منصاب
والجمر الاحمر زد كلاني لهيبه

لاجيك لو آطا على هامه الداب
ترى المسافه بين الاحياء قريبه

لكن خايف من عذول وكذاب
يمشي على نور القمر ويحكيبه

اليوم حنا في زمن ماله ثياب
ومبدى الشهر بالليل ماينسريبه

ما قلته الا من تجارب وحساب
اكلت من شوكه ويابس عسيبه

وجرحه عطيب بضامري مابعد طاب
انا ضحيه هالزمان وصويبه

ياما على الابهام عضيت الانياب
ودموع عيني فوق خدي سكيبه

والنار في صدري تلهب تلهاب
من كود ماجاني وعظم المصيبه

الضيق والعبره وتقفيل الابواب
واللي جرالي للعدا يندعيبه

عبدن خلقه الله تعاقبه الاسباب
يوم آتذكر بالليال العصيبه

لكن خلينا على ستر وحجاب
وصكي حديد النافذة يالحبيبه

ما عاد الي بالحب مبدى ومرقاب
مادام دون الوصل خوفن وريبه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر