"شيخ الرجاجيل" - مفرح الضمني

الاعتذار من الأمير تركي بن عمر بن ربيعان العتيبي حيث
اقام الأمير للشاعر وليمة غداء ولكنه لم يستطع الحضور

فقد كان رفيق للشاعر على عجلة من أمره ولم يستطع
الحضور:

ياشيخ يابن الشيخ شيخ الرجاجيل
يا عز روق إليا بلتهم بليه

يابن عمر ريف اليتاما المراميل
يا عون من يرجي وراه العطيه

ياللي محلك للنشاما مداهيل
غير الشحم والهيل فيك الحميه

لولاك تركي كان سميتك سهيل
عليه ابن حثلين ساق المطيه

اسمح لنا يابن الذي يتعب الخيل
أنا مقصر والمطاريش أذيه

لزمت عزيمتكم وحنا معاجيل
ولاني بمن يعصى مشورة خويه

عن شوف ديوانك نحتنا المحاويل
من الرياض إلى الكويت الأبيه

لازم نعوضك بالليال المقابيل
وإن عدتها ياشيخ حقك عليه

واسلم وسلم لي على كل حلحيل
نسل الفهود اهل النفوس النقيه

اللي بمجلسهم تدور الفناجيل
ربعن طربهم صبة الشاذليه

اولاد روق مخضبين المصاقيل
لاجنب الراعي طريق الرعيه

لحقو على اللي يبردن المغاليل
نسل الصويتي من بنات العبيه

مع ضف ابو تركي بعيد المصاويل
عوق الخصيم إليا تعدى اردعيه

© 2024 - موقع الشعر