سله السيف - مطلق بن شويه

سولف على النوّار والنود والريف
همسك رشاش وضحكتك برق غيمه

تمطر على البيداء من السيف للسيف
أربع ليال وخالف السيل ديمه

منها الغصون تصير خضر ومواريف
من عقب ماكانت يباس وهشيمه

سولف وبعّد عن حشاي التحاسيف
و دكّ الهجوس اللي بصدري مقيمه

من شفتك ياحلو طعم السواليف
القلب طيّب والنوايا سليمه

عطني من أعماقك ثلاثٍ على الكيف
ترا لهن في وسط قلبي خريمه

واغفايتي بين الثنين المواليف
ضمّة غلا فيها ميانه وشيمه

في ساعةٍ ماهيب واقع ولا طيف
أعود معها للسنين القديمه

وأنا من البارح عيوني ملاهيف
على رغد هاك القوام ونعيمه

اللي وصوفه غير كل التواصيف
عينٍ روت منها وعينٍ محيمه

ياكيف أببدا فيك والا أنتهي كيف
وأنت العديم اللي وصوفك عديمه

ريان عودك يانحيل السراجيف
شيٍ يفرّج له وشيٍ يضيمه

والجمرتين اللي تحت سلّة السيف
والشامه اللي جاورتهن يتيمه

على صباحٍ بان فوق المشاريف
بيان نور الحق فوق الظليمه

ومجدلٍ ماله على أحدٍ معاريف
الا يديك اللي تليّم عتيمه

الفقر ماهو فقر قل المصاريف
الفقر فقر اللي ماحطّك نديمه

خذني ودثرني عن الهم والحيف
معك أحس لباقي العمر قيمه

والشوق يمطر فالضلوع المهاديف
أربع ليال وخالف السيل ديمه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر