ألا يافهد قم صل

ألا يافهد قم صل واشعم لبوك النار
وقلط حديدٍ غالياتٍ مثامينه

مصانيع رسلانٍ على كيف ابوك اخيار
ونجرٍ من أغلى صنعت الشام شارينه

وتكريمهن البن والهيل والمسمار
هذا كيفهن والحمد لله مرهينه

وكثر تراحيبك ليا وصلوا الخطار
وبيّن لهم باب الفرح من براهينه

وعلاك بالطيب ولو غليت الأسعار
خطات المربّى اللي هل البيع مغلينه

وحذرا تهاون يافهد واذهن المعذار
ترا البخل فالرجال ماهوب يازينه

ترا المصطفي وصّى على الضيف هو والجار
وخويك ليا خاواك لا واحد يهينه

ترا الرجل محدٍ يعرفه كود بالأذكار
ليا زان فعل الرجل كثروا محبينه

وخلك على ربعك مثل وابل الأمطار
ولاتصير وإن شان الدهر من معاوينه

ترا ماتصيب البندقيه بدون عيار
وسفن البحر ماترسي الا علي المينه