مدري

مدري وش اقول .. لكن ( جعلها خيره )
لو ان بعض السوالف مالها داعي

ان جت ل طاري المعاتب ( فضها سيره )
من كف غيرك / ترى مابرّيت اوجاعي

لااااااا تكمّل اللي بقى .. وتزوّد الحيره
بعد غيوم الصبر شحّت على قاعي

همّك لحاله .. بنى له ف الحشاء ديره
وانا يال ( لله ) .. افلّ لهمّي شراعي

ضايق .. وثوبي عليّ افك ازاريره
وكل الحسايف معي جملة وقطّاعي

خطاً .. مايستاهل اندوّر معاذيره
لا أقنعك فيه وبلاش تحاول اقناعي

وكان انك لغيبتك .. قصيت تأشيره
الالتفاته وراء .. ماهيب من اطباعي

لك مني .. احفظ ل ذاك الوقت تقديره
واسامحك من دهر عمري ل مرباعي

لو تعرف .. الود .. والتقدير .. والغيره
مارحت ترقد وغيرك ساهر ٍ واعي