قل تم

مافي وجيه اعذارك البارده .. دمّ
حتى ايش لو قدّمتها بابتسامه

حتى ايش .. لو انك من اليمّ لليمّ
تملك مقاليد الحكم والزعامه

ماعاد يفرق عندي الكيف والكمّ
من بعد ماعرضتني للملامه

ف الموقف اللي منه ضايق ومهتمّ
ياشرهتي .. ( قامه ولامن ندامه )

الى هنا / واطوّي رشايه من الجمّ
واهنّي اللي ماغدى .. بالسلامه

قلبٍ جروحه من طعونك بني عمّ
مافيه شيٍ يستحق اهتمامه

انت اعتبرني كبريائي .. وقل تمّ
احفظ لتاريخ الغرام احترامه

وانا ب اقّفي بالخفوق المحطمّ
وابعتبرها دون نفسي .. شهامه

لو في فراقك همّ .. في رجعتك همّ
كلش ولا شيٍ يمس الكرامه