الضيقة - مساعد السوارج

( الضيقة )
 
حزين ولا لقيت الضيقتي يا للأسف تفسير
وهواجيسي تجي واتروح والضيقة هي الضيقة
أنا لا جيت أعبّر عن همومي خانني التعبير
تملكني حزن قلبي وهمي صرت ما طيقة
أعاند دمعة أحزاني وأقول اللي يصير يصير
أساير خطوتي والله شؤونه في مخاليقة
وأنا لو أبتسم وأجاري الضحكات ما من خير
صحيح أضحك وقلبي من همومه ناشفٍ ريقة
أنا مدري علامي غير والدنيا بعيني غير
عجيبة قصتي والوقت غنالي طواريقة
ليا قدرت حظي قلت ما يستاهل التقدير
لأني خابره دايم يجنبني توافيقة
وليا هديت طيري قلت في نفسي عساه يطير
ولكن البلا طيري تعثر في مسابيقة
وليا قلت الأمل بكره حصل في واقعي تغيير
عرض لي حظي العاثر وحلمي صعب تحقيقة
حزين ولا شكيت الا زمان ٍ صار به تقصير
وهواجيسي تجي واتروح والضيقه هي الضيقة
© 2023 - موقع الشعر