سارق ومسروق - محمد معرفي

عجب لا قلتلي بانك تعبت ومابقى بك شوق
عجب لا قلتلي بان اللي تحبه ناوي حراقه

تعبت شلون وانت اللي ربيت بداخلي برفوق
ولا ذقت المرار اللي يهد القلب لا ذاقة

اجل وشلون لاجتك التهايم من عديم الذوق
حبيبي لو تعرف الحب ماذميت عشاقة

تيسر كان لك حبن جديد وشايفن معشوق
امانة واصلة لاتحرق المعشوق بفراقة

تركد في هواك لاتعيشة طايش ومطفوق
عشان الحب يبقى بينك وبينة على ساقة

وتذكر يوم كنت بداخلي دم جرى بعروق
شوف الخفوق شلون لاجيت صوبة فزت اشواقة

تظل ولو رحلت اغلى علاقة عاشقها مخلوق
تظل الدفتر اللي كم ربى الشعر باوراقة

كتيتك في القصايد لان شفتك بالقصيد تروق
نعم ولا انت مالك لاجمل فيها ولاناقة

ولانك كل مامريت بيتي يفز لك طاروق
بدعت بحورن لين الشعر جددت ميثاقة

لانك كل ماداويت قلبي تلحقة بحروق
تلذذت الفتيل وكل جرحن نار باعماقة

ولانك لانويت تكون فوق الكل شافك فوق
شريتك جل من اعطاك قدرن شع براقه

ولانك وين مابعدت صرت السابق الملحوق
تمنيت الوصال اللي عليه النفس تواقة

واذا ودك تشوف شلون ضاعت في سببك حقوق
شوف دموع العشيق اللي سكنت بداخل احداقة

سرقت العمر مني ثم غديت بعبرتي مخنوق
بعد ما كنت اظنك في بقايا عمري اشراقة

لك الله كيف كنت السارق ويفخر بك المسروق
امانة شفتلك مسروق يتباهى بسراقة

الخالديه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر