عيونك ذوقتني المنايا

ياللي عيونك ذوّقتني المنايا
ياللي دموعك بالحكي مالها...نعت

دمعك؟عليم الله بذيك النوايا
أشعلتني يومك من الضحك.....دمّعت

بعدك؟ جميع اللي عشقوني ورايا
دامك شريت رضاي يا غايتي...بعت

ثنتين بأثنينٍ !لك اربع مزايا
فوق الخيال وفوق مانا توقّعت

يا من أخذت من الخفايا خفايا
ما غير لوصالك تعطّشت أو جعت

بسمة شفاتك في (جميع الزوايا)
لا شفتها يا طلّة النور..ضيّعت

ودّك تشوف الحب؟؟شوف المرايا
أنا اشهد انك في وصوفه ّتمتّعت!!

أمشي لحالي بس كنّك معايا!
في داخلي يا كثر ما انت توزّعت

الحب خالد والمشاعربقايا
دامك وفيٍّ في خفوقي تربّعت

الحب لا منّه سكن بالحنايا
ثمٍ تغلّيت ورجعت وتدلّعت..

ما زحزحه فعل وكلام الوشايا
الاّ ليا منّك بغيري تولّعت

الحب ما هو وردتين وهدايا
الحب فوق اللي بغيت وتطلّعت

عذّبتني ما بين عذر وخطايا
ولاّ الجروح اللّي على الكيف نوّعت

حنّا ضحايا وأنت سيد الضحايا
لا شك عن بعض الأوادم ترفّعت

دام الحياة اللّي بعينك...منايا؟؟
ياليتني في موت عينك...ترعرعت